Wa nay transport strike
CEBU, Philippines - Dili na mahinayon ang gikatakda untang transport strike sa mga drayber ug operator karong Lunes Hulyo 21 niining tuiga human nga positibo ang resulta sa panagtagbo sa mga lider sa transport groups ug ni Department of Transportation and Communication Secretary Joseph Emilio Aguinaldo Abaya.
Kini maoy gipahibalo ni Romeo Armamento, pangulo sa National Confederation Transportworker Union for the Visayas kagahapon nga nahinabi sa Banat News.
Matud pa ni Armamento nga gisanong ni Abaya ang ilang hangyo uban ni Cebu City Congressman Raul Del Mar nga tun-an pagbalik ang Joint Administrative Order 2014-01.
Samtang himoon ang pagtuon og balik sa JAO-2014-01 ilang gihangyo nga suspensuhon ang pagpatuman niini.
Si Armamento miingon nga sila sa transport group dili manginlabot sa dagko kaayong balayranan sa madakpan nga kolorum nga mga sakyanan tungod sila nga mga operator ug mga drayber gusto nga masumpo kini.
Dugang pa ni Armamento nga alas -10 ang takna sa buntag karong adlawa makigtagbo ang mga lider sa transport group sa rehiyonal nga buhatan sa Land Transportation Franchising and Regulatory Board (LTFRB) 7 Regional Director Ahmed Cuizon ug Land Transportation Office (LTO) 7 Officer-in-Charge Arnel Tancinco.
Si Armamento nagkanayon kinahanglan nga amendahon ang mando nga pamultahon og apil ang mga operators sa kalapasan sa drayber.
Giangkon ni Armamento nga daghan sa mga drayber karong panahona ang mahimong ireklamo sa mga pasahero og over charging tungod kay ang minimum nga P7.50 nga plite apan sagad sa mga drayber P8 man ang gikolekta niini.
Si Joe Tumongha nga presidente sa Alliance of Progressive Labor (APL) dinhi sa Sugbo ug sakop sa Regional Tripartite Wage and Productivity Board (RTWPB) nga nahinabi sa Banat News miangkonng dako ang epekto sa pamuo ang transport strike. Apan nakasabot kaayo siya nga ang Joint Administrative Order 2014 – 01 dili gayod makiangayon. (/EIM)(BANAT NEWS)
- Latest
