CEBU, Philippines - Lima ka kilong marijuana sud sa bag nga narekober duol sa lugar diin maapsi ang duha ka mga lalaking nakuhaa’g mga armas luwan sa usa ka pribadong sakyanan gituohang mga estudiyante ang baligyaan.
Si Senior Superintendent Noli Romana, ang hepe sa Cebu City Police Office (CCPO) miingon nga base sa ilang impormasyon, tag 50 pesos ang baligya sa matag stick sa marijuana kung estudiyante ang mopalit, samtang 100 pesos kung langyaw.
Sumala pa ni Romana nga dili pa sila makatug-an kung usa ba ka grupo ang naglihok sa dakbayan sa Sugbo karong panahona nga maoy nag-supply sa mga drugas. Gipasabot sa opisyal nga karong panahona ang oras nga mogara sa pagbaligya sa drugas tungod sa tingklase.
Usa ‘sab karon nga gustong masayran sa opisyal kung asa gayod sa area sa Balamban gitanom ang maong mga drugas. Kahibaloan nga duha ka mga batan-on nga sakay sa usa ka Mitsubishi Adventure ang gigukod ug nasikop sa kapulisan nga nakuhaan pa og mga armas ug dili momimos lima ka kilo nga marijuana. (/EIM)(BANAT NEWS)