CEBU, Philippines - Ang Department of Science and Technology -7 mipasigarbo sa ilang mga bag-ong mga ekipo ug nangambisyon nga makabaton og kaugalingong weather satellite nga ipalupad ngadto sa kawanangan aron mas mapalapdan ang ilang serbisyo ngadto sa publiko batok sa mga kalamidad.
Pipila sa mga nahimo sa DOST-7 mao ang mga early warning system nga nagamit gyud sa pag-monitor sa kalamidad.
Usa sa pinakadakong tabang nga naserbisyo niini mao ang Doppler radar nga aduna’y lain-laing kolor nga mao karon ang gigamit sa Philippine Atmospheric, Geophysical and Astronomical Services Administration (PAGASA).
Matag kolor niini nagrepresentar og pipila ka kusgon ang hangin ug ang uwan ug makapangandam og maayo ang publiko.
Lain pang proyekto mao ang automated water level system diin mahibaw-an tulo ka oras sa dili pa mahitabo ang posibleng baha kung kusog ang ulan.
Aduna na’y 98 yunits ang DOST-7 nga gipahimutang na sa dakbayan sa Sugbo, Bohol, Siquijor ug Negros.
Gibutyag sa DOST nga base sa ilang pagtuon kritikal ang dakbayan sa Lapu-Lapu, Siquijor, Negros ug Bohol tungod kay bantang kini sa tsunami kun dunay linog sa kadagatan.
Ang dali nga pag-irog sa yuta basi sab sa gikusgon sa linog mao ang hinungdan sa posibleng tsunami o storm surge sa maong mga lugar. Matud ni Edilberto Paradela sa DOST nga migahin og P600 milyones ang nasudnong kagamhanan alang sa ilang duha ka proyekto nga Planet Earth Data Resources ug Development of the Philippines Earth of Micro Satellite nga usa ka weather satellite nga ipatuman sulod sa duha ngadto sa tulo ka tuig.
Sa pagkakaron padayon ang community enhancement science and technology alang ngadto sa mga barangay sa bukirang bahin sa Sugbo nga makahatag og report sa ilaha kabahin sa panginahanglan sa katawhan ilabi na sa nutrisyon, panglawas ug ang solar energy nga gigamit na sa usa ka barangay sa Madridejos nga importante kaayo panahon nga walay kuryente ang lugar. (BANAT NEWS)