Hepe sa Compostela girelibohan

CEBU, Philippines - Girelibohan na sa iyang katungdanan ang hepe sa lungsod sa Compostela nga gipasanginlan nga midawat og P50 mil bugti sa pag-areglo sa kaso sa usa ka langyaw nga nasikop sa iyang sakop nga matud pa naghithit og marijuana.

Gimando ni Senior Superintendent Noel Gillamac, hepe sa Cebu Provincial Police Office ang pagrelibo kang Senior Inspector Samuel Romanillos ug temporaryo kining gibutang sa CPPO tungod sa himuong imbestigasyon sa Provincial Intelligence Branch (PIB) may labot na sa maong kontrobersiya.

Nakakuha og dokumento si Gillamac nga nagpamatuod sa pasangil batok sa maong hepe nga naglakip sa certificate of inventory sa pag-aresto sa langyaw nga pinirmahan pa sa kapitan sa maong barangay diin naaresto ang langyaw ug ang spot report nga nabuhat na unta sa kapulisan, apan wala na-record sa ilang buhatan ug wala sab napasa sa CPPO.

Sumala pang Gillamac klaro kaayo nga duna’y tulubagon si Romanillos ug mas maayo nga iya kini nga mapasabot sa himoon nga imbestigasyon.

Gisulayan unta og tawag sa Banat News pinaagi sa cellphone si Romanillos aron unta kakuhaan og reaksyon may labot sa pagrelibo kaniya apan wala kini motubag sa mga tawag. Apan  sa naunang interview kaniya sa Banat News niadtong nakalabay nga adlaw, iyang gipamahayag nga andam kini nga moatubang sa bisan unsa nga himoon nga imbestigasyon ug mipasangil nga dunay tawong nasagmuyo kaniya nga gusto siyang mapapahawa sa maong lungsod. - /EIM) (BANAT NEWS)