Hepe sa Compostela imbestigaron
CEBU, Philippines- Imbestigaron ang hepe sa kapolisan sa lungsod sa Compostela nga gipasanginlang nidawat og P50,000 bugti sa pagpagawas sa usa ka langyaw nga nasakpang naghithit og marijuana.
Gimandoan sa direktor sa Cebu Provincial Police Office (CPPO), Senior Supt. Noel Gillamac, ang Provincial Intelligence Branch (PIB) sa pagpahigayon sa imbestigasyon kang Senior Insp. Samuel Romanillos.
Matud ni Gillamac nga kung mapamatud-an ang alegasyon, posibleng marelibohan si Romanillos ug mag-atubang usab og kasong administratiba.
Si Romanillos nga nahinabi sa Banat News mitug-an nga Hunyo 7 nahitabo ang insidente diin wala nila na-blotter ang pagkasikop sa langyaw sanglit wala sila’y nakuha nga ebidensya.
“Wala man to na blotter sir kay dili man to pwede mahimong ebidensiya, tumoy sa papel man lang ang nakuha nga wala’y marijuana, inig abot sa crime lab ato, wala ra gihapon, last month pa man nang hitabo-a sir, ambot gani nganong karon pa na migawas og tinuod pa,” matud ni Romanillos.
Duda ni Romanillos mao nga duna’y nasakitan nga mga badlongon sa ilang lugar nga nakatilaw sa iyang istrikto nga pamaagi sa pagsikop sa mga drug pushers lakip na sa iyang mga sakop nga wala ka uyon sa iyang istrikto nga pagdumala.
“Kaila nako sir og kinsa na sila nasuko naku,” dugang pamahayag ni Romanillos.
Matud ni Romanillos nga andam siya moatubang sa imbestigasyon sa CPPO aron usab iyang matubag ug malimpyo ang iyang pangalan gikan sa maong kontrobersiya. - /GMR) (BANAT NEWS)
- Latest
