CEBU, Philippines- Aniay maayong balita niadtong mga gun owners nga gustong magpa-renew o ba kaha magpa-lisensya og armas, ang Police Regional Office (PRO) 7 ubos sa kamandoan sa Kampo Crame mipahigayon og “One Stop Shop Caravan” alang sa maong katuyoan sugod kagahapong adlawa.
Ang maong pagproseso sa mga dokumento sa mga armas sa mga pribadong tawo ingon man government issued firearms molanat og tulo ka adlaw.
Matud pa ni Senior Superintendent Marvin Sanchez, ang hepe sa Firearms Explosives Security Agency and Guards Supervisory Section (FESAGS) sa PRO 7, dako kini og tabang sa mga gun owners tungod kay makamenus sila sa gastos.
Kahinumdoman nga si PNP Director Chief Supt. Alan Purisima mipagawas og bag-ong kamandoan nga kinahanglang adto na sa Camp Crame magproseso sa lisensya sa armas human daghang mga nagparehistro niini nga migamit diay og peke nga pangalan ug mga address ug wa na ma-trace kun asa napadung ang mga armas nga na-expire na ang lisensya.
Apan dunay gipagawas nga temporary restraining order ang Korte Suprema batok niini tungod sa gisang-at nga reklamo sa mga gun clubs.
Sumala pa ni Sanchez nga ila sab kini nga gitumong aron madasig ang katawhan nga palisensyahan g’yud ang ilang mga gipangtagoan nga armas, aron dili sila magpanuko kung ugaling kinahanglan nila kini pagpanalipod sa ilang kaugalingon. - /EIM) (BANAT NEWS)