Magsuong opisyal, 4 ka tanod gisuspenso
CEBU, Philippines- Gisuspenso og 60 ka adlaw ang managsuong barangay opisyal ug upat ka tanod sa Ibabao, Cordova aron paglikay nga makaimpluwensiya sa kasong gipasaka ngadto sa korte.
Si Mayor Adelino Sitoy niluwat sa kamandoan sa pagsuspenso nilang Kapitan Chito Bentazal ug iyang igsoon nga si Konsehal Marvin Bentazal.
Nalakip sa pagsuspenso ang mga tanod nga sila si Emiliano Bentazal, Theodoro Berdin, Efren Macillana, ug James Tampus. Ang kaso nitumaw sa pagbadlong sa mga opisyal sa usa ka Roy Co, presidente sa komite sa kalingawan, nga nagpahimutang sa sound system alang sa disko.
Gipakita ni Co ang kapitan sa iyang permit nga iyang nakuha gikan sa barangay ug gikan sa munisipyo.
Gumikan sa pagdumili ni Co, nahitabo ang panaglalis.
Nakamatikod si Co nga armado ang konsehal hinungdan nga iyang gitawag si SPO3 Rolando Pogoy kinsa diha sa maong dapit niadtong higayona ug gidakop ang konsehal apan giingong gipugngan sa upat ka tanod ug nahitabo ang karambola. Nasakmit gikan kang Konsehal Bentazal ang KG9 sub-machinegun nga gidala nga wala’y lisensiya hinungdan sa pagkabalhug sa bilanggoan apan nakagawas human nakapiyansa og P175,000.
Kalapasan sa paghupot og armas ang gipasaka sa korte batok sa konsehal ug grave coercion ang gipasaka batok sa kapitan ug upat ka tanod. - /GMR) (BANAT NEWS)
- Latest
