CEBU, Philippines - Gipasanginlang nanghikap sa paa ug sampot sa 11-anyos nga babayeng tinun-an ang usa ka maestro sa pangpublikong eskwelahan sa dakbayan sa Talisay.
Ang insidente nahitabo niadtong Hunyo 19 sulod sa classroom ug ang suspetsado napasakaan na og kasong “sexual harassment” sa niaging semana sa piskaliya.
Matud pa nga ulahing niuli ang tinun-an gumikan kay wala dayon i-record sa maestro ang iyang score sa quiz ug sila na lang duha niadtong higayuna.
Human na-record ang iyang score, ang tinun-an miasoy nga nigawas siya apan gitawag siya sa suspetsado balik sa sulod sa classroom ug gihatagan siya og chicharon ug P10 nga i-plete pauli.
Sa iyang paggawas, gitawag na usab siya nga pabalikon ug gihatagan og laing P10 sa maestro ug gibunlot ang iyang kamot aron maduol kaniya.
Human nagunitan ang bukton sa tinun-an, giingong gigakos siya sa maestro ug ang tuong kamot sa suspetsado gipasulod sa iyang sayal ug gihinol ang iyang paa ug ang walang kamot sa suspetsado mihinol usab sa sampot sa bata dayon gihagkan ang iyang tuong aping.
Matud sa tinun-an nga giingnan siya sa suspetsado nga “pwede ra man kaha?, ayaw og saba ha?” Wala motingog ang biktima kinsa nagdaling nigawas sa classroom ug misumbong sa iyang inahan nga maoy nikuyog pagtaho sa buhatan sa kapolisan.
Ang tinun-an nagkanayon nga dili na siya ganahang mobalik og eskwela sa kahadlok ngadto sa iyang maestro. (/GMR)(BANAT NEWS)