Gamot sa natumba nga acacia dugta na

CEBU, Philippines - Padulong na pagkadugta ang gamot sa karaang punoan sa acacia nga natumba sa karsada sa Balud, San Fernando sa niaging adlaw diin usa ka dumptruck ang nadat-ugan.

Kini ang nasuta sa gihimong imbestigasyon sa Department of Environment and Natural Resources-7.

Matud sa tigpamaba sa DENR-7, Eddie Llamedo, nga tungod sa maong insidente mopahigayon sila og full assessment sa mga century old trees sa mga nag-unang kadalanan gikan sa lungsod sa Minglanilla paingon na sa lungsod sa Sibonga.

Susihon sa DENR-7 ang mga kahoy nga pwede pang i-repair ug ang mga kahoy nga kinahanglan na’ng putlon tungod kay delikado na aron makalikay sa disgrasya.

Ang full assessment sugdan sunod semana sa DENR-7 inabagan sa tabang sa Department of Public Works and Highways.

Si Llamedo midugang nga sagad sa mga kahoy daplin sa kadalanan walay mga saktong maintenance ug kini maoy ilang nakita nga rason kun nganong ang mga kahoy daling madunot.

Tungod niini nanawagan ang DENR-7 sa publiko nga kun mahimo dili bangagan ang mga kahoy, kawtan ug tigbason tungod kay mao kini ang sagad sa mga rason kun ang kagaw mosulod ug madunot ang kahoy.

Sa pagkakaron anaa pa lang sa walo ka mga acacia trees ang na-identify sa DENR-7 nga angay na’ng putlon nga makita sa dakbayan sa Naga.

Nasayran nga century old acacia tree nga natumba anaa sa 145 sentimetros ang gilapdon ug 15 metros ang iyang gitas-on.  (BANAT NEWS)