CEBU, Philippines - Gibati og katahap ang mga senior citizen sa barangay Jagobiao, dakbayan sa Mandaue nga gisakyan og mga politiko ang gipasiugdahang eleksiyon kagahapon tungod sa higpit nga panag-atbang sa mga nagpapili nga presidente.
Si kanhi barangay konsehal Hipolito Tibon miingon nga daghan sa iyang mga kauban ang nagbagolbol tungod kay gidungan ang pagpahigayon sa piniliay ug ang pagpanghatag sa tag P1,500 nga insentibo.
Tungod kay giuna ang piniliay, matud ni Tibon nga daghan kanila ang gipang-gutom sa pagpaabot nga mahatag ang ilang tag P1,500.
Si Jagobiao barangay kapitan Ma. Editha Montesa miingon nga ang kahugpungan sa mga senior citizen nga usa ka non-government organization daw nahisama na hinuon nga pundok politikanhon.
Gawas nga niadtong miaging adlaw ang kisaw sa pagpangampanya, iyang namatikdan nga dunay sakyanan nga nanghakot ug may mga pasangil nga namalit og P200 ngadto sa P300. Si Arturo Robis ug Ernesto Gacita nga apil sa mobotar nga mga senior citizens nga nahinabi sa Banat News miingon nga lakip sila sa giduol ug gihatagan usab og sobre nga may sulod nga kuwarta ug may gipataban nga pangalan sa kandidato apan ilang gibalibaran. - /GMR (BANAT NEWS)