P2M livelihood fund sa Carcar gihatag sa DAR

CEBU, Philippines - Gipagawas na sa Department of Agrarian Reform (DAR) - 7 ang P2 milyones nga pundo alang sa mga livelihood projects sa mga mag-uuma sa siyudad sa Carcar. Si DAR-7 Assistant Regional Director ug kasamtangang Provincial Agrarian Reform Program Officer II Dr. Antonio del Socorro nagkanayon nga ang maong pundo gigahin alang sa mga livelihood projects nga giila sa Local Poverty Reduction Program ubos sa Participatory Budgeting Process (PBP) projects nga kanhi mao ang Bottom-Up Budgeting.

Matud pa ni Socorro nga ang maong pundo pormal nga gitugyan ngadto ni Carcar Mayor Nicepuro Apura nga gisaksihan ni DAR Cebu OIC Provincial Agrarian Reform Program Officer I Alex Relova niadtong nakalabay nga adlaw.

Sumala pa ni Socorro nga ang gitumbok ni Mayor Apura nga livelihood alang sa mga kahugpungan sa mga mag-uuma ubos sa Micro-financing Program niini mao ang alang sa swine fattening, cattle fattening, vegetable production ug fishing materials.

Ang mga beneficiaries sa maong pundo mao ang walo ka mga farmer's organization nga gilangkuban sa Carcar Communities Multi-Purpose Coop, Liburon MPC,  Valladolid Farmers Association, Conta Manghupi Farmers Association, Sitio Mohon Talamban Chicosan, Carcar Tuyom Farmers Association, Bolinawan United Seaweeds and Farmers Association ug Guadalupe Kapunungan alang sa Kauswagan. (BANAT NEWS)