Contractor kinahanglan nga may Asphalt Batching Plant
CEBU, Philippines - Adunay mga opisyal sa Department of Engineering and Public Works (DEPW) sa dakbayan sa Sugbo nga misugyot nga angay g’yud unta nga ibutang sa rekisitos sa bidding alang sa pag-aspalto sa karsada nga ang kontraktor adunay asphalt batching plant.
Nabantayan sa mga engineers sa dakbayan nga ang rason nga daghang mga road asphalting project nga malangan sa pagpatuman kay sagad sa mga gagmay’ng kontraktor nga makadaog sa bidding walay kaugalingon nga batching plant.
Ang ilang himuon mao ang paghangyo sa mga dagkong kontraktor nga makapalit sila og aspalto nga magamit alang sa ilang proyekto.
Si City Engineer Jose Marie Poblete nga gikuhaan og reaksyon sa sugyot sa ubang engineers walay pagsupak kay matud niya ang tumong niini mao man ang pagpadali sa kahumanan sa proyekto.
Matud ni Poblete nga tinuod ang obserbasyon nga ang ubang kontraktor nga nanag-iya og asphalt batching plant maneguro man usab nga unahon ang ilang proyekto sa paghuman.
Apan hinoon si Poblete miingon nga kun kini hingpit nga ipatuman ang modaog sa bidding kadto ra g’yud nga mga dagko nga kontraktor ug wala na’y kahigayonan ang mga gagmay’ng kontraktor nga walay kaugalingon nga batching plant. (BANAT NEWS)
- Latest
