CEBU, Philippines - Ipasusi ang lugar nga gitukuran sa usa ka subdivision sa barangay Ibabao, lungsod sa Cordova.
Kini ang kamandoan ni Cordova Mayor Adelino Sitoy nunot sa reklamo sa mga residente batok sa Solid Stone Corporation, developer sa usa ka subdivision.
Ang grupong Nagkahiusang Mananagat sa BangBang nga gipangunahan ni Rogaciano Sumagang nangreklamo sa pagparat sa ilang tubig ug ilang gituohan nga ang pagkawot sa yuta sa maong subdivision ang hinungdan.
Tab-ang matud pa ang tubig sa ilang lugar apan sukad nga gisugdan ang illegal quarry sa maong proyekto miparat na matud pa ni Anselma Degamo.
Nag-abot kagahapon sa buntag ang kadagkoan sa developer sa maong subdivision ug mga residente sa Provincial Environment and Natural Resources Office sa Kapitolyo.
Gihimakak sa abogado sa developer, Atty. Carlo Fortuna, ang maong reklamo sanglit duna sila’y gihimo nga mababagan ang pagsulod sa tubig sa dagat paingon sa tinubdan sa tubig nga imnon sa mga molupyo.
Si Mayor Sitoy sa iyang bahin miingon nga karong sunod semana mopahigayon sila og ocular inspection sa maong proyekto kauban sa hingtungdang ahensiya sa gobiyerno. (/GMR)(BANAT NEWS)