Nanghikap sampot sa asawa sa polis sikop

CEBU, Philippines - Demalas ang usa ka lalaking nanghikap sa sampot sa usa ka sexy nga babaye nga nag-short pants kay asawa sa polis.

Nagpatabang sa Carbon Police Station ang usa ka babaye human gihikap ang iyang sampot sa usa ka tindero og ukay-ukay sa Ermita, dakbayan sa Sugbo niadtong Huwebes sa hapon.

Matud ni PO2 Mario Nator sa Carbon Police nga nahinabi sa Banat News nga dali nga nagpakitabang sa ilang buhatan ang maong babaye gumikan sa kahadlok sa suspek nga giingong daw sa nahigam sa iyang sampot.

Ang suspetsado naila nga si Henry Asong Arreglado, 35, ulitawo, nagpuyo sa barangay Basak, dakbayan sa Sugbo.

Sa inisyal nga imbestigasyon sa kapolisan nasayran nga samtang nagpili og ukay-ukay ang babaye, ang tindero nagsige na og pasiplat.

Wala makaagwanta ang suspek, gihikap gyud ang sampot sa babaye.

Daling gisignit sa kapolisan si Arreglado human positibong gitudlo sa babaye nga maoy nihikap sa iyang sampot.

Matud ni Nator nga na-tripan lang gyud ang babaye sanglit wala’y timailhan nga naka-drugas ang suspek.

Ang suspek gitanggong sa Carbon Police detention cell ug gipasakaan og kasong acts of lasciviousness. (/GMR)(BANAT NEWS)