CEBU, Philippines - Gikompirma sa City Intelligence Branch (CIB) nga gigamit na sa mga drug lords ang mga bata sa ilang operasyon isip mga “drug couriers” dinhi sa dakbayan ug posible usab sa probinsya sa Sugbo.
Matud pa ni Superintendent Romeo Santander ang hepe sa CIB sa Cebu City Police Office nga kaniadto pa sila sige makadawat og impormasyon bahin niini ug duna na usab silay nadakpan kaniadto nga menor de edad nga nakuhaan og daghang shabu.
Base sa impormasyong ilang nadawat, dunay 8-anyos hangtud 12-anyos nga mga bata ang gigamit nga drug couriers karon sa mga nalambigit sa illegal drugs.
Nagtuo si Santander nga walay kalibotan ang mga bata nga ilegal ang gipahatud kanila. Apan posible usab nga may pagtugot sa ilang mga ginikanan ang gipabuhat kanila, ilabi na niadtong mga walay klarong trabaho.
Nasayran nga base sa Juvenile Justice Law, ang bata nga moubos sa 15-anyos dili mahimong prisohon kun makahimo og krimen.
Daan nang gisaway sa kapolisan ang maong balaod gumikan kay sa pagdagan sa panahon nagkadaghang mga bata ang nalambigit na sa mga krimen tungod kay sila na maoy gigamit sa mga criminal nga mohimo sa ilang ilegal nga mga kalihokan.
Nanawagan si Santander sa mga ginikanan nga bantayan kanunay ang ilang mga anak aron dili sila magamit sa mga ilegalista sa ilang mga krimen. (BANAT NEWS)