Tulo ka City Hall engineers gi-dismiss

CEBU, Philippines - Gitaktak na sa serbisyo ang tulo ka engineer sa kagamhanan sa dakbayan sa Sugbo human sila mamatud-i sa Office of the Ombudsman nga sad-an sa kaso nga graft and corruption nga gipasaka batok kanila.

Sila si Cebu City Assistant Engineer June Nadine Sison, Juanito Pua ug Joel Pasatiempo gitangtang na ni Mayor Michael Rama gikan sa ilang serbisyo sugod kaniadto’ng Hunyo 24. Si Pua maoy hepe sa Construction Division samtang si Pasatiempo, project engineer. Ang tulo ka engineer pareho nga nadistino sa Department of Engineering and Public Works (DEPW) ug gipasakaan og kaso ni Engr. Robert Montenegro, tag-iya ug manager sa FE&A Construction.

Gipasanginlan ni Montenegro ang tulo ka engineer nga nagkunsabo sa pagpangayo kaniya og kuwarta ingon man uban nga butang sama sa mahalon nga camera ug computer sa mata’g higayon nga aduna siya’y project nga makuha sa City Hall.

Atol sa husay sa kaso, si Montenegro mipresentar og mga ebidensya nga nakadawat sa ilang gidemanda nga kwarta ug ubang butang sila si Pasatiempo ug Pua, apan kang Sison walay napakita si Montenegro.

Igo lang miingon si Montenegro nga si Sison isip assistant engineer maoy nag-awhag kaniya nga pahatagon og mahalon nga camera ug computer. Matud sa Ombudsman nga isip mga kawani sa kagamhanan angay gayud unta nga ang mao nga mga engineer magbinuotan.

Si Sison miingon nga naguol kaayo siya sa hukom sa Ombudsman ug gibarogan nga wala siya mangilkil kang Montenegro.  (BANAT NEWS)