CEBU, Philippines - Gihangyo karon sa Mines and Geosciences Bureau (EMB) sa Department of Environment and Natural Resources (DENR-7) si Gov. Hilario Davide III nga hunungon ang gikatahong illegal nga small-scale gold mining activities sa Sitio Boswang, Barangay Cambang-og, Toledo City. Sigon pa ni Raul Laput, ang OIC-Mining Operation Officer sa Mines and Geosciences Bureau sa DENR-7, sa iyang duha ka pahina nga sulat hangyo ngadto kang Davide nga namatud-an nga nagpadayon ang ilegal nga gold mining sa mga residente sa naasoy nga lugar. Gibanabanang niabot na og usa ka hektarya ang gilapdon sa mina kansang luna naapil sa Mineral Production Sharing Agreement sa Atlas Consolidated Mining & Development Corporation (ACMDC). Hinuon iyang gitataw nga ang maong area posibleng madeklarar isip People's Small-Scale Mining Area (o Minahang Banay) ubos sa Republic Act No. 7076 sa higayon nga makompleto na sa pagkuha sa gikinahanglanon nga mga rekisitos. Ug tungod niini, si Laput nihangyo sa buhatan sa gobernador nga ang kagamhanan sa siyudad sa Toledo ug sa barangay Cambang-og inubanan sa mga kapolisan nga hunongon ang naasoy nga gold mining activities sa sitio Boswang, Barangay Cambang-og, Toledo City sa labing daling panahon. (BANAT NEWS)