Tulisan sa mga PUJ nadakpan

CEBU, Philippines - Usa ka armadong lalaki nga gisumbong sa mga residente sa Alaska-Mambaling nadakpan sa kapolisan, suspek gitumbok nga responsable sa mga pagpanulis sa mga pasaheroang jeepneys sa maong dapit.

Giila ang dinakpan nga si Leopoldo Resobadero Aroa, alyas “Poldo”, 30, ug nagpuyo sa Sitio Lawis, Mambaling, Cebu City. Matud pa ni PO3 Diosdado Andales sa Mambaling Police Station nga nahinabi sa Banat News dunay mitawag kanila ug misumbong bahin sa tawong armado nga nagbahas-bahas sa ilang lugar.Misuway unta sa pag-ikyas ang suspek apan naapsan ni PO2 Raymund Aballe. Sa pagsubay sa kapulisan sa record sa dinakpan, ilang nahibaw-an nga notado diay kini nga tulisan sa mga PUJ sa maong lugar, ug kini miyembro sa “Balo Robbery Group” nga naglihok sa maong lugar.

Apan sumala pa ni PO3 Andales ang suspek mirason nga pangdepensa sa iyang kaugalingon ang gidaladala niining .22 magnum revolver nga dunay tulo ka bala apan walay dokumento alang sa legal nga paghupot niini, nakuhaan usab siya og duha ka paketeng shabu.  (BANAT NEWS)