CEBU, Philippines - Gitinguha nga ibalhin sa laing bakanteng luna ang ang night market sa dalan Colon, dakbayan sa Sugbo.
Kini human namahayag ang Department of Public Works and Highways-7 nga ilegal ang night market.
“Actually basin tungod sa karsada kay naay total closure so basin maka-move somewhere naay vacant lot, parking lot or unsa dinha,” matud ni Konsehal Alvin Arcilla, chairperson sa committee on markets sa konseho sa dakbayan. Atol sa public hearing sa konseho sa niaging semana, si District Engineer Fernando Cruz miingon nga ilegal ang night market tungod kay gigamit niini ang national road.
Matud ni Cruz nga nakalapas kini sa Republic Act 917 kon Philippine Highway Act of 1953.
Matud ni Arcilla nga si Cebu City Mayor Michael Rama ang makahukom kun unsa ang buhaton sa night market ug mokonsulta usab sa market authority.
Tumong ni Rama nga matabangan ang mga kabus pinaagi sa pagpahigayon sa night market.
“We should always balance kay remember atong project is to make the lives of the poor to become better and the middle class to live comfortable and the rich not to control,” niingon si Rama.
Matud sa pangulo sa Downtown Vitalization Project, George Chu, kinahanglan ang night market aron mobalik ang pagkahimong sentro sa dalan Colon sa negosyo sa dakbayan sa Sugbo ug magtapok ang mga tawo.
“To bring back the old glory of the downtown. Para sab mahatagan ang mga negosyante nga dili maka-afford og abang sa mga dagku nga building ug kahigayunan nga makatinda. Seasonal ra man sad na ang night market,” matud ni Chu. “Colon is dead (negosyo). Nabalik lang na siya mga 2007,” dugang niya. (BANAT NEWS)