CEBU, Philippines - Kritikal nga nalandig sa tambalanan ang usa ka traysikad drayber human gipuspusan og dos por dos sa ulo sa iyang kasumpaki nga habal-habal drayber pasado alas 11 sa buntag niadtong Martes sa Holy Family Country Homes Subdivision, Pardo, dakbayan sa Sugbo.
Ang biktima giila nga si Leonides Badayan Navarro, 23, minyo, taga Villa Agbate, Kinasang-an, dakbayan sa Sugbo samtang ang suspetsado giila nga si Joseph Sabroso.
Matud ni SPO4 Rey Cuyos sa Homicide Section sa Cebu City Police Office nga nagkasumpaki ang duha human nagyawyaw si Navarro nga giingong giilogan og pasahero ni Sabroso. Apan gihimakak ni Sabroso ang pasangil sanglit nagpakanaug ra siya sa iyang pasahero sa traysikad sa parking area.
Nagkita og balik ang duha ug nagkatinubagay diin giingong gihulga ni Navarro nga iyang patyon si Sabroso kinsa wala makapugong ug mipuspos ni Navarro og dos por dos tumong sa ulo sa makadaghan nga higayon.
Dali nga gidala ang biktima sa Cebu City Medical Center (CCMC) tungod sa naangkon nga dakong samad sa ulo apan gumikan sa talandugong kahimtang, gibalhin kini sa Vicente Sotto Memorial Center (VSMMC) samtang ang suspetsado daling nisibat. (BANAT NEWS)