Hazing ipa-monitor

CEBU, Philippines - Gimandoan sa direktor sa Police Regional Office-7 ang tanang hepe sa kapolisan sa Rehiyon-7 nga i-monitor ang mga lugar nga posibleng adunay hazing nga gihimo sa mga fraternities.

Matud ni Chief Supt. Prudencio Tom Bañas nga dunay balaud nga nagdili sa paggamit og hazing ug usa ka binuang ang pagpasakit sa gustong mosulod ug makig-amigo sa usa ka grupo.

Gipanawagan usab ni Bañas ang mga ginikanan nga kanunay’ng estoryahon ang ilang mga anak aron mapasabot kung kini nagplano nga mosulod sa usa ka grupo ilabi na kung dunay hazing.

Buot ang opisyal nga dili mapareho sa nahitabo sa ubang kabataan nga namatay gumikan sa hazing.

Matud niya nga kinahanglang madungog sa mga anak nga dili na kinahanglan nga moapil sa usa ka grupo aron may kaduolan kung dunay problema. Ang pamahayag ni Bañas giluwatan human sa laing batan-on nga nagtungha sa usa ka unibersidad sa Manila ang namatay gumikan sa hazing. GMR (BANAT NEWS)