CEBU, Philippines - Duna na’y gipagawas nga kamandoan ang hepe sa Cebu City Police Office (CCPO) nga nagrelibo sa 35 ka mga polis niini aron ipaubos sa re-training program sa kapulisan. Matud pa ni Senior Superintendent Noli Romana nga ang maong mga polis duna’y mga record sa pagpabuyag ug gidudahan nga protektor sa ilegal nga drugas ug kadtong mga tambok. Gitun-an pa karon sa kapulisan kung asa dapit himoon ang maong programa, apan gikataho nga kini mahitabo sa labing dali nga panahon.
Sa 35 ka mga polis nga ipaubos sa maong programa, walo niini ang naggikan sa Talamban Police Station.
Sa pakighinabi sa Banat News sa hepe sa maong buhatan Senior Inspector Bienvinedo Miral kini mipasabot nga wala siya’y supak kung ma-relieve ang iyang mga sakop, apan gusto niya nga dunay ikahulip sa mabakanteng pwesto.
“Dili man hinoon ma-jeopardize pero apektado g’yud kaayo mi diri kung walay ipuli nga polis, wala ko’y mahimo, multi tasking ang paagi namo dri,” matud pa ni Miral. Sa pagkutlo ning balita wala pay nadawat nga kamanduan si Miral sa pag -relieve sa iyang mga sakop. (BANAT NEWS)