Estudyante ug drayber naghikog

CEBU, Philippines - Duha ang patay sa duha ka insidente sa paghikog sa dakbayan ug probinsya sa Sugbo niadtong Domingo, usa kanila estudyante sa usa ka unibersidad ug residente sa Banawa, Guadalupe, dakbayan sa Sugbo.

Giila ang maong tinun-an nga mao si Mariani Lyra Otero Olarte, 24, residente sa maong lugar ug 4th year College sa kursong Respiratory Therapy nga nagtungha sa usa ka unibersidad dinhi sa dakbayan.

Si PO3 Leroy Baguio, imbestigador sa Homicide Section sa Cebu City Police Office nagkanayon nga gamit ang sling sa bag nga gihikot niini sa taas nga bahin sa grills sa bintana sa kasilyas ug gihikot niini sa iyang liog. Matud pa ni Maria Olarte, inahan sa nagpakamatay nga nahibulong na lang kini nga sa dihang iyang gituktok ang kwarto sa iyang anak aron unta sa pagpaniudto ang wala na gyud kini mitubag.

Inabagan sa iyang bana ilang giablihan ang kwarto sa dalaga apan nakugang sila nga nagbitay na kini ug wa nay kinabuhi, gisuwayan kini pag-revive sa Emergency Rescue Unit Foundation apan patay na kini atol sa ilang pag-abot.

Gituohang personal nga problema sa iyang uyab ug sa eskuylahan ang hinungdan niini.

Samtang patay sab ang usa ka drayber nga si Gonzalo Yocor Jr., 33, human nga  nagpusil sa iyang ulo sulod sa iyang gimaneho nga multicab sa Diversionary Road sa Relis, Barangay Poblacion 1, Carcar City  kagahapon sa buntag.

Base sa imbestigasyon sa kapolisan, kauban ni Yocor ang iyang uyab nga si Maricel Repollo Inoc, taga Naga City ug namahuway gikan namasahero atong gabhiona dihang giingong nagpusil kini sa iyang ulo. Gidala si Deloria sa Carcar Provincial Hospital apan gideklarar kini nga dead-on-arrival. Matud ni SPO3 Jorame Tanudtanud, imbestigador sa Carcar Police Station nga duna’y asawa si Yocor.

Mitug-an si Inoc nga aduna’y problema mahitungod sa pamilya si Yocor ug misuway na ’sab kini sa paghikog niadtong unang semana ning buwana pinaagi sa pagbitik sa iyang liog apan napugngan. Problema gihapon ang gituohang rason sa maong paghikog. Nakuha sa kapolisan ang usa ka kalibre .38 rebolber nga may lima ka bala ug usa ka kabhang niini. (BANAT NEWS)