CEBU, Philippines - Ang konseho sa dakbayan sa Sugbo miawhag og public hearing aron hisgotan ang kontrobersyal kaayo nga Administrative Order nga naglatid og dagko kaayo nga multa sa mga drayber nga makalapas sa balaod sa tukma nga pagpamaneho og sakyanan, ilabi na ang kolurum nga mga public utility vehicles.
Giuyonan sa mga magbabalaod sa dakbayan ang gisugyot ni Konsehal Gerardo Carillo nga angay’ng magpahigayon gayud og public hearing anhi sa dakbayan sa Sugbo nga tambongan sa mga tag-iya og public utility vehicles sama sa bus, taksi ug jeepney. Gawas sa mga tag-iya og public utility vehicles, dapiton usab nga motambong ang mga tag-iya og pribado nga sakyanan, ang kadagkoan sa Land Transportation Franchising and Regulatory Board (LTFRB), Land Transportation Office (LTO), ilabi na ang mga opisyal sa LTFRB-Manila.
Gipasabot ni Konsehal Carillo nga bisan og gisugdan na sa pagpatuman ang Administrative Order 2014-01 sugod kaniadtong miaging Hunyo 19, apan angay gayud nga adunay ipahigayon nga public hearing aron ang mga hingtungdan makapadangat sa ilang sentimento.
Mga tag-iya og sakyanan misaway sa kadagkoan sa DOTC nga direkta nga mipatuman og dako nga multahan sa makahimo’g kalapasan sa balaod sa tukma nga pagmaneho og sakyanan nga wala’y konsultasyon sa publiko.
Ang labing dako nga multa moabot og P1 million nga ipahamtang ngadto sa mga tag-iya og kolurum nga bus. Hangtod kagahapon, tulo na ka bus pasaheroan nga giingon nga kolurum ang nasakpan sa LTO.
Ang usa ka kolurum nga bus didto masakpi sa Lawaan, Minglanilla sa una g’yud nga adlaw sa pagpatuman sa kontrobersyal nga administrative order. Ang ikaduha nga kolurum nga bus didto masakpi sa Danao ug ang ikatulo didto madakpi sa Bohol. Nahibaw-an nga kolurum ang mao nga mga sakyanan tungod kay ang iyang mga engine ug chassis numbers wala motukma sa serial numbers sa iyang Certificate of Registrations.
Hinuon ang tag-iya sa Sunrays Bus Line nga unang nadakpan sa LTO nangangkon nga wala gayud sila mag-operate og kolurum nga bus. Giangkon nila nga duha ang serial numbers sa chassis sa ilang bus apan ang usa niini gitawag og production number, ug ang usa mao gayud ang chassis numbers.
Si LTO Regional Director Arnel Tancinco miingon nga kadtong bus nga nasakpan nila sa Danao klaro g’yud kaayo nga kolurum.
Ang multa sa mga mag-operate og kolurum nga truck ug van P200 mil, ang mag-operate og taxi o kotse nga kolurum multahan og P120 mil, samtang P50 mil sa mga mag-operate og kolurum nga PUJ, dayon P6 mil sa tag-iya’g motor nga gamiton sa pagpamasahero.