Sakyanan gi-carnap nabawi
CEBU, Philippines - Nabawi sa kapolisan sa Talamban Police Station ang usa ka sakyanan nga gi-carnap sa subdivision sa Talamban, dakbayan sa Sugbo.
Ang maong sakyanan usa ka Isuzu Crosswind, kolor green nga nagdala og plate number nga YKE-980 nga gipanag-iya ni Maria Marjorie Ranili Purino, residente sa Maryville Subdivision sa Talamban.
Matud ni PO1 Gringo Muldez sa Talamban Police Station nga sa adlaw sa pagkawala sa maong sakyanan niadtong Hunyo 23, wala pa nasuta kung kinsa ang nagkawat niini.
Usa ka adlaw sa wala pa nabawi ang sakyanan, ang tag-iya giingong nakadawat og text message gikan sa igsoong lalaki ug nangayo og kwarta bugti sa sakyanan.
Niadtong Hunyo 25, nasigpatan sa usa ka saksi nga si Fr. Justin Lee ang sakyanan nga gidala sa igsoon ni Marjorie nga gi-parking sa St. John Seminary, Good Shepherd, Banawa.
Mipahibawo si Lee sa kapolisan nga ang nagdala sa sakyanan mao ang igsoon ni Marjorie ug daling girespondehan nilang SPO4 Ricardo Escobedo ug kaubanan. (Jasmin Anais R. Llanillo, USJ-R Intern/GMR)(BANAT NEWS)
- Latest
