CEBU, Philippines - Tungod sa sobrang selos gikulata sa usa ka lalaki ang iyang kapuyo hinungdan sa pagpakitabang sa babaye sa mga barangay tanod sa sitio Butong, Binaliw, dakbayan sa Sugbo niadtong Huwebes sa gabii.
Si Linelyn Dagumo, 24, mireklamo nga gikulata sa iyang kapuyo nga si Joniel Owatan, 26, parehong nagpuyo sa maong lugar.
Giingong nagselos ang lalaki sa iya ra usab uyoan hinungdan nga nakulatahan ang babaye. Ang mga tanod nga sila si Renato Herrera ug Allan Oporto ang daling misikop sa lalaki ug mitawag og pakitabang sa Talamban Police Station. Apan sa pagrikisa sa kapolisan sa wala pa gipasulod sa detention cell, maoy nakuha ang duha ka paketeng shabu sa bulsa ni Owatan.
Hinoon sumala pa ni PO1 Alcindor Suico sa Talamban Police Station nga nahinabi sa Banat News nga wala na’y plano pa ang babaye nga mopasaka og kaso sa iyang kapuyo apan tanggongon gihapon si Owaton gumikan sa nakuhang ilegal nga drugas. (/GMR)(BANAT NEWS)