CEBU, Philippines - Usa ka 53- anyos nga retiradong U.S Special Forces ang gitusak og bala sa usa ka wala mailhing tawo nga nagsakay og motorsiklo diha atubangan sa ilang balay sa Sitio Poo, Barangay Balud, Dalaguete kagahapon sa hapon.
Ang biktima giila nga si Stephen Rhey Gornto, kasamtangan nga nag-abang og balay kauban sa iyang asawa nga Filipina nga si Dahlia Nacana Repasa diha sa maong lugar.
Matud ni Inspector Rico Emperwa, hepe sa Dalaguete Police nga nahinabi sa mga tigbalita, nagbarog atubangan sa gate sa ilang gipuy-an ang biktima kay dunay gihuwat nga kostumer sa negosyo niining pagpamaligya og sakyanan.
Ang kapuyo sab sa biktima nga si Repasa ang igo lang nakadungog sa sunod sunod nga buto sa armas, ug iya na lang nakita nga nagkadugo na si Gornto. Sumala pa ni Emperwa nagsuot og helmet, cargo short pants ug puti nga sweater ang nag-inusarang mamumuno.
Gisubay na karon sa kapulisan ang kuha sa mga close circuit television (CCTV) nga nahimutang duol sa crime scene.
Dugang pa ni Emperwa nga pipila ka bulan na ang nakalabay duna’y nakaaway nga usa ka Briton ang biktima ug usa kini karon sa ilang gisubay gawas sa uban pang posibleng motibo sama sa negosyo ug personal nga kaaway sa gipatay.
Nakuha diha sa crime scene ang 13 ka mga kabhang ug usa ka slug gikan sa wala pa matinong kalibre sa bala.
Ang Cebu Provincial Police Office (CPPO) mipadala na og dugang imbestigador aron motabang pagsulbad sa maong kaso.
Si Superintendent Rodolfo Albotra ang hepe sa Provincial Intelligence Branch nagkanayon ilahang gisubay ang grupo sa mga gun for hires sa habagatang bahin sa Sugbo nga posibleng may kalambigitan sa maong krimen.
Sa laing bahin, patay ang usa ka habal-habal driver diha sa Jolomaynon sa mao gihapong lungsod.
Ang biktima giila nga si Efren Esem Sanoy, 29, residente sa maong dapit kinsa nakaangkon og pinusilan sa ulo ug sa liog. Ang biktima maghatud unta sa iyang pasahero nga si Jesus Albaracin paingon sa Barangay Jolomaynon dihang gipara sa duha ka mga tawo nga nagtaptap og t-shirts sa nawong ug mimando kang Albaracin sa pagdagan.
Human niini, nadunggan na lang ni Albaracin ang nagsunod nga buto sa armas maong midangop siya sa kapolisan. Patay na si Sanoy pag-abot sa mga polis.
Anggulo sa ilegal nga drugas maoy gidudahang motibo sa maong kaso, nakuha sa crime scene ang duha ka kabhang sa bala nga kalibre .45. ( Jojo Ugdol ug Thea Deseree Ceniza, USJR Intern/EIM)(BANAT NEWS)