CEBU, Philippines - Duha ka police stations sa probinsya sa Sugbo ang gipanid-an karon tungod kay duna mga sakop nila ang nalambigit sa ilegal nga drugas.
Si Senior Superintendent Noel Gillamac, direktor sa Cebu Provincial Police Office (CPPO) wa hinuon mobutyag kun asa kini nga mga lungsod.
Mipasidaan sab si Gillamac ngadto na sa kapulisan nga nagplanong mosulod sa ilegal nga kalihokan nga mas maayo pang di sila mopadayon.
Base sa report nga nadawat ni Gillamac, mga drug protectors ang maong mga polis. Gipasalig hinuon ni Gillamac nga sa dili madugay ipublikar gihapon nila ang ilang mga pangalan.
Gusto karon sa kapulisan nga malimpyohan ang ilang organisasyon aron dili maapil ang mga nagtinarong sa ilang serbisyo. (BANAT NEWS)