CEBU, Philippines - Giangkon kagahapon sa hepe sa Regional Epidemiology and Surveillance Unit (RESU) Rennan Cimafranca nga usa na ka outbreak ang pagkatap sa sakit nga tipos sa lungsod sa Borbon sa amihanang Sugbo.
Matud ni Cimafranca, ang kalit nga pagsaka sa gidaghanon sa mga nasakit niini nagpasabot nga duna gyuy outbreak kon epidemiya.
"Wa man namo gi declare pero mura na man. Di na man gud kinahanglan i-declare kay ang number of increase unusual kaayo. I-check man g’yud na ang mga previous records nila. Wa man kaayo sila’y ingon ana nga kaso," si Cimafranca namahayag.
Gibutyag usab sa opisyal sa Department of Health 7 nga ilang nakita nga walay ensakto nga chlorinator ang water source sa tubig didto sa barangay Lugo diin maoy gikuhaan og tubig sa apektadong barangay nga Lugo, Clavera ug Cajel.
Gikan sa 37 niadtong Miyerkules sa udto, misaka na sa 74 kagahapon ang natala nga nataptan sa tipos.
Ang labing bata sa natakbuyan nag edad og tulo ka bulan samtang ang labing tiguwang 48 anyos, apan ang labing daghan nag-edad og 10 ngadto sa 20 anyos.
"Kanang 74 nga among gi-report, mao gyud na silay actual nga nakita didto unya na consult sad sa doctor. Ang concentration sa kaso mao ‘tong barangay Lugo ug Clavera. Adjacent ra gyud ni sila sa highway," dugang ni Cimafranca.
Nasuta usab sa pag-imbestigar sa RESU nga dunay lunangan sa kabaw tulo ka metros gikan sa tangke sa tubig nga ilang kuhaan og mainom. Girekomendar nila ang pagbutang og temporaryong chlorinator aron malimpyo ang tubig nilang sag-ubon. (BANAT NEWS)