Duha ka wanted sikop

CEBU, Philippines - Human sa unom ka buwan nga pagtagotago, nasikop sa kapolisan ang duha ka wanted sa kasong frustrated murder sa dakbayan sa Lapu-Lapu.

Ang nasikop mao sila si Jobernie Lyle Rio ug Alejandro Amemita, mga hingkod ug mga molupyo sa barangay Ibo sa maong dakbayan.

Matud sa hepe sa Station 2 sa Lapu-Lapu City Police Office, C/Insp. Conrado Manatad, nga pinasikad sa warrant of arrest nga giluwatan ni Regional Trial Court Branch 53 Judge Anna Marie Militante ang ilang pagsikop sa duha human kini kalit mipakita sa lugar. Si Amemita misuway unta og eskapo hinungdan nga nahitabo ang ginukdanay apan nasikop ra sa mirespondeng kapolisan.

Ang duha ka akusado ang gitumbok nga mikulata ug midunggab sa usa ka lalaki sa ilang lugar niadtong Disyembre 2013. (Bong Soriano/GMR)

Pusher nadakpan, kustomer nakadagan

Nadakpan sa akto sa kapolisan ang usa ka batan-ong lalaki nga nagbaligya og shabu ngadto sa wala pa mailhing kustomer kinsa mikaratil og dagan kagahapon sa tungang gabii sa Barangay Looc, dakbayan sa Mandaue.

Ang nadakpan mao si Mardonio Soco, 18-anyos, nagpuyo sa maong dapit.

Sila si PO2 Niño Gorneo ug PO2 Jessie Jamez Villarino sa Presinto 5 sa Mandaue City Police Office ang nagpatrolya dihang ilang nasigpatan ang duha ka batan-on nga may kadudahang lihok.

Ang kauban nga lalaki nga maoy unang nakakita sa nagpadulong nga mga polis ang kalit lang midagan hinungdan nga gisita sa kapolisan si Soco kinsa buot usab untang modagan.

Si Soco nga naggunit sa usa ka gamay’ng paketeng shabu wala na makalihok hinungdan nga girikisa ug nakuhaan pa og laing pakete sa shabu, usa ka tin foil ug disposable lighter nga gihuptan niini. (BANAT NEWS)