CEBU, Philippines - Giisyuhan og citation ticket ang usa ka maestra sa Bonbon Elementary School, bukirang bahin sa dakbayan sa Sugbo aron pabayron og multa kay wala gi-segregate ang mga basura sa iyang classroom.
Si Grace Luardo, hepe sa City Environmental Sanitation Enforcement Team (CESET), miingon nga usa ka semana ang ihatag nila nga tagal ni Angel Flores aron pagbayad og multa.
Matud ni Luardo nga kun mapakyas si Flores sa pagbayad sa P500 nga multa sulod sa usa ka semana gikan kagahapon, mapugos sila pagpasaka og kaso sa hukmanan.
Gitahasan ni Luardo ang iyang mga sakop nga suroyon ang mga tunghaan ug sutaon kun aduna ba sila’y basurahan nga gilain-lain na daan ang malata ug dili malata.
Dihang gisusi sa mga CESET enforcers ang classroom ni Flores namatud-an nga wala niini tudloi ang iyang mga tinun-an nga motuman sa lagda nga gilatid sa balaod.
Sa downtown area, ang mga sakop sa CESET misusi usab sa mga classroom sa Mabolo Elementary School ug Barangay Luz Elementary School diin nasuta nila nga mituman kini sa balaod.
Matud ni Luardo nga salikwaot paminawon nga ang tua na hinuon sa bukid ang wala motuman sa lagda. (BANAT NEWS)