CEBU, Philippines - Duna'y shabu lab dinhi sa Sugbo? Kini ang padayon pa nga gisubay sa City Intelligence Branch sa Cebu City Police Office tungod sa nakuha nga high grade shabu gikan sa usa ka gipasanginlang drug pusher sa Duljo Fatima, Cebu City nga napatay sa kapolisan.
Si Superintendent Romeo Santander mibutyag nga mitumaw ang ilang pagduda tungod sa nakuhang yellowish nga shabu nga sa resulta sa chemical analysis sa PNP Crime Laboratory “high grade†kini nga shabu.
Gikompirmar sa crime laboratory nga usa ka taas nga klase sa drugas. Dunay nakuha nga impormasyon ang kapulisan nga posibleng aduna’y nag-operate nga shabu lab nga nahimutang sa bukirang bahin dinhi sa Sugbo. Apan wala pa silay hustong impormasyon kung diin dapita kini. Kahinumdoman nga nasakmit sa kapolisan ang 29 ka medium size packs nga “high grade†shabu gikan sa napatay nga si Lloyd Cabahug sa Duljo-Fatima. Si Cabahug giingong sinaligan sa usa ka dakong drug lord nga nag-operate sa Duljo-Fatima ning dakbayan. (Jojo C. Ugdol/EIM)
Ginang gipatay atubangan sa mga estudyante sa grade one
Usa ka ginang ang gipusil patay samtang kini nagpaabot sa iyang anak nga nag-eskuyla sa Vito Elementary School sa Barangay Vito lungsod sa Balamban sa nakalabay’ng adlaw.
Giila ang biktima nga si Grace Cordisar, taga Sitio Lingatong sa mao gihapong barangay.
Matud ni PO2 Franklin Jaranilla sa Balamban Police Station nga naglingkod ang biktima sa gawas nga bahin sa maong tunghaan samtang nagpaabot sa iyang anak nga manggawas gikan sa eskuylahan.
Apan usa ka wa mailhing lalaki nga nagtaptap og pula nga t-shirt sa iyang nawong sakay og motor ang miduol sa biktima ug mition og armas kaniya hinungdan nga midagan kini paingon sa sulod sa tunghaan apan gigukod kini sa suspek dayon pusil sa tulo ka higayon.
Nalup-og ang biktima sulod sa classroom sa grade one nga niadtong tungora nagklase pa. Dali usab nga misibat ang suspek human sa maong pagpamusil sakay sa motorsiklo. Patay na kini pag-abot sa tambalanan.
Si Dr. Arden Monisit, provincial schools division superintendent miingon nga nagpadala na sila sa ilang legal team nga gipangulohan ni Atty. Alfonso Saniel aron pagsuta kun adunay administrative lapses ang tunghaan ilabi na sa seguridad
Buot usab ni Monisit nga ipailawom sa stress debriefing sa Department of Social Welfare and Development (DSWD-)7 ang mga tinun-an sa grade one nga nakakita sa hitabo. (BANAT NEWS)