Show cause order batok Ceres Decemay

CEBU, Philippines - Mopagawas og show cause order ang Land Transportation Franchising and Regulatory Board-7 batok sa tagdumala sa Ceres Bus nga nalimbuwad sa Dawis, Lungsod sa Carmen niadtong adlaw’ng Domingo.

Kinahanglan usab nga moduso ang bus operator og mga dokumento nga magmatuod nga may gihatag kining tabang sa mga pasahero nga naangol sa aksidente.

Matud ni Atty. Edwin Antepuesto, legal counsel sa LTFRB-7, nga posible usab nga mopahamtang sila og preventive suspension batok sa bus operator.

Si Antepuesto miingon nga ang driver sa bus nga si Ronald Lato ipaubos sa drug test ug ang ubang yunit ubos sa prangkisa sa nadisgrasyang bus lakip sa ilang ipaubos sa motor vehicle inspection.

Ang bus operator giingong nipasalig nga mohatag og pinansyal nga tabang sa mga naangol sa aksidente.

Samtang gipasalig usab ni Gobernador Hilario Davide III nga tabangan sa Kapitolyo ang mga nangaangol. Ang Land Transportation Office-7 sa ilang bahin miingon  wala’y engkuwentro ang bus atol sa disgrasya matawag nga reckless driving ang gihimo sa driver.

Matud ni acting LTO-7 regional director Arnel Tancinco nga ang driver sa bus makabayad sa P2 mil  nga multa ug dili makamaneho sulod sa tulo ka buwan.

Kasamtangang gikustodiya sa kapolisan sa lungsod sa Carmen  ang drayber samtang nagpaabot sa tagtungod sa mga biktima nga mopasaka og kaso.

Matud ni PO2 Everett Capauyan, imbestigador sa Carmen Police Station, nga nahinabi sa Banat News nga usa sa mga kabanay sa naangol nga giila nga si Risarri Magale, anak sa biktima nga si Evelyn Magale, ang desididong mopasaka og kaso.

Nasayran nga 39 ang naangol sa maong insidente kinsa gipangdala sa Vicente Sotto Memorial Medical Center ug sa mga pribadong tambalanan sa dakbayan sa Sugbo.  (BANAT NEWS)