CEBU, Philippines - Subayon sa Regional Intelligence Division-7 kung diin gikan ug kung kinsa ang nag-supply sa mga armas ug mga bala sa usa ka gun-runner nga nasikop sa City Intelligence Branch sa Mandaue City Police Office sa barangay Gun-ob, dakbayan sa Lapu-Lapu. Si Col. Paul Labra, hepe sa RID-7, mipasabot nga gusto nilang susihon kung wala ba’y nagpaluyo nga mga aktibong sakop sa militar ug kapolisan sa nasikop nga si Tomas Codilla nga taga Umapad, dakbayan sa Mandaue.
Matud pa ni Labra nga ang makahupot lang sa mga matang sa bala nga nasakmit bugtong ang naa lang sa serbisyo sa kasundalohan ug kapolisan.
Naglakip sa mga armas nga nasakmit mao ang automatic pistol INTRATEC 9mm Luger Model Tec-KG9 uban sa magazine nga may 16 ka bala, .45 caliber pistol Colt Government Model nga adunay pito ka bala sa magazine, duha ka extra magazine sa KG9, tulo ka extra magazine sa .45 cal, pistol, upat ka rifle grenades, usa ka fragmentation grenade, usa ka 22 magnum ug upat ka bala.
Nakuha nga impormasyon sa Banat News gikan sa kasaligang tinubdan nagkanayun nga posibleng dugay na ang maong mga bala.
Posibleng gideklarar lang kini nga napabuto na ug dili na ma-account gikan sa usa ka sakop sa militar. Napusilan sa mga sakop sa CIB-MCPO si Codilla human kini misukol atol sa buy-bust operation ug daling gidala sa Mactan Doctor’s Hospital. Sa nasayran kang PO3 Renato Inot nga natigayon ang buy- bust operation human nila madawat ang kasayuran labot sa usa ka tawo nga mobaligya og KG9 nga armas sa kantidad nga P50,000 ang matag usa ug .45 cal. pistol sa kantidad nga P15,000. (BANAT NEWS)