Sisterhood tali sa Mandaue, North Cotabato gitinguha
CEBU, Philippines - Nagtinguha ang mga lokal nga opisyal sa North Cotabato nga mamugna ang usa ka sisterhood agreement tali sa dakbayan sa Mandaue.
Si Bise Mayor Rodolfo Gantuangco sa dakbayan sa Kidapawan, presidente sa Vice Mayor’s League of the Philippine (VMLP)-North Cotabato, nipalabang og resolusyon nga ilang gipadangat ngadto kang Mandaue City Mayor Jonas Cortes ug Bise Mayor Glenn Bercede.
Tuyo sa grupo nga mapalambo pa ang maayong pagsinabtanay sa duha ka lokal nga kagamhanan alang sa pagbayloay sa kulturanhon ug ekonomikanhong kaayohan.
Ang nakitang kalamboan sa dakbayan sa Mandaue maoy gitinguha nga makaambit usab ang kalungsuran ug dakbayan sa North Cotabato ingon man ang naangkon nga kalamboan sa ilang lugar mapaambit usab sa dakbayan.
Si Konsehal Diosdado Suico sa iyang pamahayag mihangop sa maong tinguha sa mga opisyal sa North Cotabato ug iyang gitataw nga ang maong resolusyon ilang matuki ug ilang ikapalabang ang resolusyon sa pagsanong sa katuyoan. (BANAT NEWS)
- Latest
