Mga milagro dili dayon patuohan

CEBU, Philippines - Giawhag ni Msgr. Esteban Binghay, Episcopal Vicar sa Artsidyosesis sa Sugbo, ang katawhan nga dili basta-basta motuo sa mga estorya kabahin sa mga nagmilagrong imahen tungod kay dili tanang milagro gikan sa Kahitas-an ug posibleng usa lang kini ka pagpangilad.

Si Binghay nga gikahinabi sa Banat News nagkanayon nga una pa motuo sa ingon niini nga mga estorya kinahanglang aduna na kini gihimong imbestigasyon ug pagtuon sa simbahan.

Niadtong milabay’ng semana, usa ka imahen sa Birhen sa Fatima sa Sitio Lagang sa Barangay Ocaña, Dakbayan sa Carcar ang gidagsa sa mga tawo gumikan sa balita nga giingong mihilak kini og dugo. Matud pa usa ka 8-anyos nga anak sa pamilyang Regis kinsa maoy unang nakamatikod sa paghilak og dugo sa Birhen ug dali kining mikatap sa komunidad.

Wala hinoon maka-estorya ni Binghay ang maong bata gawas lang sa inahan niini nga mitug-an nga mao kadto ang ilang nakit-an niadtong adlaw nga Lunes. Namatikdan hinoon ni Binghay nga wala maggikan sa mata sa imahen ang giingong “dugo” kay diha ra kini sa kilid sa ilong. Nagdumili hinuon siya pagbutyag kun dugo ba gyud kadto o dili kay magkinahanglan pa man kini og siyensya nga mo-esplikar.

Si Binghay nagkanayon nga wala na siya mokuha pa og sample sa maong puwa nga kolor sa dagway sa imahen kay kung tinud-anay pa kini nga gikan sa Kahitas-an molungtad kini hangtud sa kahangturan ug dunay mga kausaban sa katawhan o conversions.

Matud pa ni Binghay kung hinimo-himo ra kini sa tawo ma-esplikar ra kini dayon gamit ang siyensya.

Giklaro usab ni Binghay nga ang orihinal nga dagway sa Our Lady of Fatima naglingi gyud og dyutay sa wala ug nagduko sa ubos samtang ang iyang wala nga kamot naa ra sa kilid sa iyang lawas.

Ang eksplinasyon ni Binghay niini, nagduko ang Birhen tungod kay nagtan-aw man kini sa tulo ka mga bata diha sa ubos didto sa Fatima, Portugal niadtong 1917 atol nga mipakita kini isip aparisyon.

Sagad sa mga nangabot sa maong pribadong kapilya sa Carcar nangaliya nga sila tabangan gikan sa ilang mga sakit ug ang uban magpatabang sa ilang mga suliran. Apan duna say uban nga gusto lang gyud nga makakita sa imahen ug nagpa-“selfie.”

Sama sa mga kaparehas nga mga kaso, gidugokan kini dayon sa mga deboto bisan wala pay klarong opisyal nga pamahayag ug pagtuon ang mga kadagkoan sa simbahan.

Matud pa niya, ang sakto untang pagsunod sa mando sa simbahan mao nga mag-una ang saktong doktrina, sunod ang saktong disiplina o kun unsaon pagsabot ang doktrina, dayon ang saktong debosyon.

Apan sumala pa niya daghan nga nag-una ang debosyon apan wala makasabot sa ilang gibuhat kun sakto ba o dili. (BANAT NEWS)