CEBU, Philippines - Patay ang usa ka 20-anyos nga lalaki gipusil sa dalan P.G. Almendras, Barangay Suba, Dakbayan sa Danao ala-una pasado ang takna kagahapon sa kaadlawon.
Si PO2 Ronald Gomez sa Danao Police Station miila sa biktima nga mao si Earl Lowel Cane, nagpuyo sa maong dapit ug ang nagpusil mao ang wala mailhing lalaki.
Human sa maong pagpusil misakay sa nagpaabot nga puti nga motorsiklo nga gimaneho usab sa wala hiilhing tawo ang mamumuno. Ang biktima nga nakabaton og samad pinusilan sa iyang kalawasan dali nga gihatod ngadto sa Danao District Hospital apan gideklarar kini nga patay na.
Upat ka mga kabhang sa kalibre .40 ug duha usab ka mga bala nga ilang gituohan nga gikan sa armas sa mamumuno ang nakuha sa crime scene.
Si Gomez miingon nga mitug-an ang amahan sa biktima nga dunay gikaaway ug gikasumbagay ang maguwang sa namatay, ug mao kini karon ang ilang gisubay nga posibleng motibo. (BANAT NEWS)