Bus natumba, 39 angol

CEBU, Philippines - Naangol ang 39 ka tawo human malimbuwad ang gisakyan nila nga bus dihang mibuto ang ligid niini samtang nag-overtake siya sa usa ka traysikol pasado alas 12:00 sa udto kagahapong adlawa sa Barangay Dawis Norte sa lungsod sa Carmen.

Ang maong bus gimaneho ni Ronald Lato, 35, taga Daanbantayan nga naangol sab sa maong hitabo.

Si PO2 Everett Capuyan, investigator, nga nahinabi sa Banat News miingon nga gikan sa North Bust Terminal ang Ceres Bus ug padulong kini sa Daanbantayan.

Base sa gihimong imbistigasyon ni Capuyan nasuta nga ang Ceres mi-overtake sa tricycle apan na-slide kini tungod sa kadangog sa karsada kay nag-ulan niadtong higayona.

Dihang na-slide ang ligid sa maong bus nibuto ang ligid sa tungod sa drayber ug nabangga sila sa gate sa tindahan nga Pentagon Glass ug gisulayan unta og bawi sa driver ang manobela apan nalimbuwad kini nga miresulta sa pagkaangol sa iyang mga pasahero.

“Ni-swerve sa fence (ang bus) nabangga sa gate, nibawi siya, natumba sa tunga sa karsada,” matud pa ni Capuyan.

Daling gidala sa nagkalain-lain nga tambalanan ang mga biktima lakip na sa mga bata ug tigulang.

Nadala sa Vicente Sotto Memorial Medical Center sila si Maria Isabel Arnado, 22; Nerissa Invento, 42; Mary Zile Dedicatoria, 2,; Mike John Invento, 11; Mevel Invento, 14; Vincent Pestaño, 25; Dela Cazada Hilven, 37; Efren Booc, 26; Mae Geraldizo, 31; Marites Burgas, 41; Ruben Monleon, 23; Alfredo Burgas Jr., 3;  ug Almira Burgas, 6.

Naangol sab sila si Reymond Rondina, 28; Christian Rondina, 6; Celirina Maramara, 20; Emmanuel Briones, 37, apan wala’y gikataho nga nagrabihan sa mga gipangdala sa nahisgutang tambalanan.

Lakip sa naangol mao sila si Lilane Balagosa, 48,; Vincent Carl Visok,20,; Lorencia Condino, 59; Chhris Ian Jay Abao, 6,; Marilyn Apas, 48; Girly Sanchez, 34; Johnke Sanches, 9;  ug Evelyn Madale, 52.

Angol sab si Ricardo Sabiton, 32; Micidel Mepeisa, 23; Marlon Adolfo, 36; Jerome Sanchez, 34; Elmer Son, 34; Michelle Descartin, 33; Daniel Descartin, 4; Eunice Sanchez, 5; Maria Isabelle Arnado, 22; Junjie Basilan, 19; Arturo Basilan, 60; George Camay, 35; ug  Justine Kent Abad, 16.

Sumala ni Capuyan nga wala kaayoy nagrabihan sa maong hitabo gani ang uban nakauli na tungod kay mga garas lang ug bun-og ang naangkon nila. (Bryner L. Diaz ug Jojo Ugdol/EIM)

“Gunrunner” napusilan sa CIB-MCPO diha sa Lapu-Lapu

Usa ka gidudahang gun runner ang napusilan ug naangol sa mga sakop sa City Intelligence Branch sa Mandaue City Police Office atol sa buy-bust operation kagahapon sa udto diha sa Humay-Humay, Barangay Gun-ob, dakbayan sa Lapu-Lapu.

Ang napusilan sa tiyan giila nga si Tomas Alvarico Codilla, 32, lumad sa Matag-ob, Leyte ug kasamtangan nagpuyo sa Paknaan, dakbayan sa Mandaue.

Ang pagsulod sa CIB-MCPO sa hurisdiksyon sa Lapu-Lapu City Police Office kabahin kini sa operasyon aron pagsikop unta kang Codilla nga diha nagsugod sa Paknaan, Mandaue City.

Sumala pa ni PO3 Renato Inot sa CIB-MCPO mibutyag sa Banat News nga siya maoy nagsilbing poseur buyer human ang ilang impormante mitug-an kang Senior Inspector Josefino Ligan nga dunay tawong dunay ibaligyang armas.

Apan sa ilang pag-adto sa Paknaan diin orihinal unta himuon ang transaksyon misensyas ang suspek nga dunay kaubang usa ka lalaking nagbitbit og bag luwan og motorsiklo nga molahos sila sa Lapu-Lapu.

Nagsunod kang Inot ang laing sakyanan nga dunay mga sakop sa CIB-MCPO uban sa ilang hepe nga si Ligan kinsa mao say mipahibalo kang Senior Inspector Rogelio Pineda, hepe sa City Anti-Illegal Drugs Task Force (CAIDSOT) sa LCPO bahin sa ilang pagsulod sa Lapu-Lapu.

Didto sila nag-abot sa Sitio Humay-Humay sa Barangay Gun-ob sa dakbayan sa Lapu-Lapu ug didto gipakita kaniya ang usa ka KG-9 Submachine pistol, matud pa nga gihangyo ni Inot nga duha ka KG-9 iyang paliton ug pakapin nalang ang laing gidala nila nga kalibre .45 pistola.

Apan tunga-tunga sa ilang panag-estorya nakabantay ang kauban ni Codilla sa armas sa hawak ni Inot ug miaksyon kini og bunot og armas hinungdan nga giunhan kini ni Inot pagbunot sa iyang armas dayong pagpaila nga siya polis.

Apan giingong gilayog siya ni Codilla kinsa mas kusgan kaniya ug sa tanto nilang inilogay sa armas iya kining napusilan sa tiyan. Ang kauban niini daling mikaratel og dagan samtang gidala sa tambalanan si Codilla.

Ang nakuha sa mga operatiba kadto rang usa ka KG-9 nga unang gipakita sa mga suspek, apan nadala og balik sa kauban ni Codilla ang bag nga gisudlan upat ka rifle grenade nga duna pay sudlanan,  usa ka granada, usa ka bandolier  ug  duha ka magazine sa kalibre .45.

Nasuta nga nakamugna og kalibog ang maong operasyon tungod kay wala diay mapahibalo ni Pineda ang mga kauban sa LCPO bahin sa operasyon sa CIB-MCPO tungod kay naghatud kini og lubong nianang mga orasa.

Si Senior Superintendent Armando Radoc, director sa LCPO gikatakdang makig-estorya ni Senior Superintendent Petronelli Baldebrin aron hisgutan ang hitabo ug kung unsay angay nilang buhaton aron di na kini mausab. (BANAT NEWS)