CEBU, Philippines - Wala makapugong ang mga traffic enforcers dihang midagsa kagahapon ang kapin sa 100 ka mahiligon og roller skates ug blades diha sa downtown area sa dakbayan sa Sugbo.
Ang mga traffic enforcers igo na lang mibadlong kanila nga dili anha sa karsada magpadagan sa ilang mga roller blades ug skates kay makabalda sila sa dagan sa mga sakyanan.
Giawhag sila sa mga traffic enforcers nga adto sa Plaza Independencia magpasundayag sa ilang abilidad isip pagsaulog sa “Go Skateboarding Day†nga gisugdan kaniadto’ng 2004.
Ang International Association of Skateboard Companies maoy nagsugod sa mao nga kalihukan 10 ka tuig na ang milabay. Dinhi sa dakbayan sa Sugbo gidili ang pagpadagan og roller skates ug blades sa mga karsada.
Sa dakbayan sa Mandaue, idili na usab unya ang pagduwa og skates sa mga karsada sa higayon nga maaprobahan na ang ordinansa nga gisugyot ni Konsehal Elstone Dabon.
Isip tsirman sa committee on transportation sa konseho sa Mandaue, si Dabon nakahukom sa pagsugyot og ordinansa tungod sa mga panghitabo nga madasmagan og sakyanan tungod sa pagpasiugda og skating sa mga karsada.
Adunay mga grupo sa mga batan-on nga magpasiugda og skating sa mga karsada sa dakbayan adlaw ug gabii.
Lakip sa mga dapit nga sagad adunay ipahigayon nga skating mao ang atubangan sa Cebu International Convention Center (CICC) o atubangan sa City Hall sa panahon sa gabii.
Dugang nga mga lugar mao ang dakong hawan sa mga simbahan nga makita nga adto sila magpraktis sa maong matang sa kalingawan sa grupo sa mga batan-on sa dakbayan.
Si Glenn Antigua nga maoy assistant head sa Traffic Enforcement Agency of Mandaue (TEAM) miingon nga may mga nahitabo na nga aksidente sa dalan nga naglambigit sa skating.
Matud ni Antigua nga angay g’yud nga adunay ordinansa nga maoy basehanan pagdakop sa makahimo og kalapasan. (BANAT NEWS)