Tulo ka akusado sa human trafficking gipabuhian sa korte

CEBU, Philippines - Tungod sa kakulang sa mga ebidensya, gipabuhian sa Regional Trial Court ang tulo ka mga babayeng akusado nga gipasakaan og kasong paglapas sa Anti-Human Trafficking in Persons Act.

Si Judge Bienvenido Saniel, Jr.,sa Branch 20 mipakawalay sala kang Jocelyn Hinayon, Mary Jane Seno ug Judith Amancio, pulos mga kawani sa Jaguar KTV Bar.

“By and large, the information and evidence in this case are not sufficient basis for a conviction against the accused. The court cannot rest its mind on a moral certainty that the accused committed the crime of  violation of Republic Act 9208 as alleged in the information, in the manner therein set forth, and that they are guilty beyond reasonable doubt,” sumala pa sa desisyon.

Gimando usab ni Saniel sa jail warden sa Cebu City Jail nga pabuhian ang tulo gawas lang kung duna pay lain silang mga kaso nga nagpugong sa ilang kagawasan. Gimando usab nga iuli ang piyansa ni Hinayon.

Ang tulo gidakop niadtong Abril 9, 2011 sa usa ka entrapment operation ug implementasyon sa search warrants nga giisyu ni RTC Judge Ramon Daomilas sa Branch 11, gumikan sa giingong pagbugaw nila sa unom ka mga kababayen-an nga nag-edad og 16-anyos ngadto sa 31-anyos. Ang tulo kusganong mihimakak sa alegasyon.

Gitambagan hinuon ni Saniel ang tulo kinsa pulos midanguyngoy paghilak human sa pag-acquit kanila nga dili na mobalik pa sa ilang karaang trabaho ug manarbaho og tinarong.

Ang abogado sa mga akusado nga si Wendell Quiban mibutyag sa media nga dili siya maoy orihinal nga abogado sa tulo kondili si anhing Atty. Noel Archival. Matud niya una pa gi-ambush si Archival duna nay desisyon nga nakab-ot ang korte. (/EIM)(BANAT NEWS)