Shabu nasakmit sud sa prisohan sa Liloan

CEBU, Philippines - Usa ka medium size nga paketeng shabu ang nasakmit sa kapolisan sa Liloan sud mismo sa ilang detention cell human sa gihimong greyhound operation sa maong bilanggoan sa milabay’ng gabii.

Kini ang gibutyag ni Inspector Prescilo Roble ang Deputy for Operations sa Liloan Police Station nga mao sa’y nangulo sa maong operasyon

Matud pa ni Roble nga ang Liloan Municipal Jail, gidumala ra sab sa Liloan Police Station ug duna kini 20 kapin ka mga piniriso.    Dili unta ilegal drugs maoy tuyo sa kapolisan kondili kontrabando sama sa mga gamit nga posibleng gamiton sa pag-eskapo tungod kay nakadawat sila og impormasyon nga dunay usa ka high-profile nga piniriso nga giinggong nagplanong moeskapo.

Wa damha sa kapolisan nga usa ka medium size pack nga shabu ang ilang masakmit, way miangkon niini. Gikuha usab ang mga bakos ug mga kutsara sa mga priso.

Si Roble mibutyag nga kulang ang ilang mga tawo nga makapahigayon og makuti nga body searches sa mga bisita sa mga priso maong nakalusot gyud ang maong shabu ug ang mga kontrabando. Wa hinuon ibutyag ni Roble kung kinsa ang maong high profile inmate nga giingong buot moeskapo. (/EIM)(BANAT NEWS)