CEBU, Philippines - Paabangang function hall nga gipanag-iya ni kanhi Cebu City Councilor Gabriel “Gabby†Leyson sa Barangay Taptap ning dakbayan sa Sugbo gikawatan sa mga butang niini. Mga kawatan gidudahang nagdala og sakyanan.
Igo na lang pagdangop sa Theft and Robbery Section sa Cebu City Police Office si Simeon Andan Jr., human niya nadiskubrehang nawala na ang mga gamit sulod sa maong function hall.
Naglakip sa gipangkawat mao ang duha ka dagko nga freezers nga kantidad P30 mil, duha ka generator sets nga kantidad P90 mil, ice maker P35 mil, equalizer P20 mil ug duha ka DVD players.
Ang caretaker sa maong establisamento ang igo na lang mitug-an sa tag-iya nga nangawala na ang maong mga butang.
Ang mga imbestigador sa TRS padayon pa sa ilang imbestigasyon sa maong hitabo apan dako ilang pagduda nga gidad-an og sakyanan sa mga kawatan ang maong mga butang tungod kay duna pay tire marks sa gawas nga bahin sa function hall.
Samtang sa laing insidente sa pagpangawat, nahanaw ang mga mahalong gadgets ug mga karaang alahas ug relo de pulos sa usa ka Marina Villamor Uy sa Sto. Niño Village, Barangay Banilad, Cebu City.
Nakuha sa kawatan ang Bulgari silver ring kantidad P40 mil, duha ka set nga silver earrings P20 mil, laptop P30 mil, Tag Heuer Vintage watch P30 mil, IWC watches nga kolor itom ug silver nga nagkantidad og P250 mil, Nautical watch P10 mil, wireless mouse nga P450 ug cash nga P1,800.
Ang kawatan anha miagi sa luyo pinaagi sa pagguba sa pultahan sa kasilyas. Wa pa matino sa kapolisan kung si kinsa ang maong mga kawatan. (BANAT NEWS)