CEBU, Philippines - Wala’y giila ang mga sakop sa Cebu City Environmental Sanitation and Enforcement Team (CESET), human sa usa ka city councilor, iladong boksidor na usab ang gidakop gumikan nagpataka og pangihi sa pampublikong lugar.
Gi-isyuhan og citation ticket ug pamultahon si Rey “Boom Boom†Bautista, human nasakpan sa sakop sa CESET nga nangihi kilid sa kalsada sa North Reclamation Area sa nakalabay nga gabii.
Si Robert Minguito, CESET officer maoy nakasakop sa boksingero nga nangihi sa maong lugar ug miisyu kaniya og citation ticket.
Matud pa ni Grace Luardo ang hepe sa CESET nga nahinabi sa Banat News, nga mireklamo pa si Bautista sa pagdakop kaniya apan si Minguito mitubag nga nakaila kini kaniya ug gani idolo niya kini.
Wala’y nahimo ang boksidor kundili ang pagdawat sa citation ticket. Gi-awhag si Bautista nga mobayad og multa nga P500, kung kini mapakyas pagbayad sulod sa pito ka adlaw mapugos ang CESET sa pagpasaka og kaso tungod sa kalapasan sa City Ordinance 1361, Anti-Littering Ordinace.
Gisuwayan pagkuha sa Banat News og habig si Bautista diha sa ALA Gym apan nakalakaw na ang boksidor, apan ang head coach sa maong prestihiyosong boxing stable nga si Edito Villamor nagkanayon nga nakurat siya sa maong report.
Apan masaligon siyang bayran ni Bautista ang multa, hinuon nagtuo si Villamor nga posibleng wala na makaagwanta ang boksidor sa tawag sa kinaiyahan.
Kahinumdoman nga si Konsehal Dave Tumulak gidakop ‘sab ug naisyuhan og citation ticket sa CESET human nasakpan nga nanigarilyo sulod sa iyang sakyanan. (BANAT NEWS)
.