CEBU, Philippines - Nalandig sa tambalanan ang usa ka traysikol driver human gipusil sa tulo ka wala mailhing tawo sa lunsgod sa Consolacion ala una kagahapon sa kaadlawon sa Barangay Polpogan sa maong lungsod.
Giila ang biktima nga si Glenn Castillo, 32 anyos, minyo, nagpuyo sa maong barangay.
Matud ni PO1 Michael Villardar sa Consolacion Police Station ang biktima nga si Castillo nagpaabot og pasahero dihang kalit lang mibutho ang mga suspek nga luwan sa usa ka motorsiklo.
Usa sa mga suspek mikanaug sa motorsiklo paingon sa nahimutang sa biktima dayong pusil kang Castillo.
Ang biktima naigo sa iyang abaga ug dali kining gidala sa tambalanan samtang ang tulo ka tawo dali usab nga nakasibat.
Nakuha sa crime scene ang kabhang sa .9mm pistol.
Base sa imbestigasyon sa kapolisan, ang biktima miingon nga wala siya’y kontra apan kini midugang nga adunay posibilidad nga ang kauban niyang driver sa maong traysikol maoy target nga nagpusil kaniya ug posibleng naalaan lang kini. (BANAT NEWS)