CEBU, Philippines - Kadtong kawani sa Metaphil Inc. nga giingong nasakmitan og pito ka gagmay’ng pakete nga may sulod nga shabu sa guwardiya sa Tsuneishi miinsister nga gibuhat-buhatan ra siya’g pasangil ug gani gireklamo niya ang mao’ng guwardiya didto sa mga opisyal sa Barangay Buanoy, Balamban.
Si Renato Pelago, mitug-an nga ang reklamo niya batok sa guwardiya nga si Joel Pugoy husayon na sa Lupong Tagapamayapa sa Barangay Buanoy unya sa Hunyo 26.
Ang guwardiya nga si Pugoy maoy mitaho sa Balamban Police Station nga nakasakmit siya og pito ka pakete nga shabu gikan ni Pelago. Base sa police blotter nga si Pelago nasakmitan g’yud og gidili nga matang sa drugas kaniadto’ng Hunyo 6.
Ang guwardiya nga si Pugoy sakop sa Marilag Professional Security Services Inc. Si Pelago miingon nga wala gayud siya gipatawag sa kapolisan kabahin sa mao nga pasangil nga nakuhaan siya’g shabu.
Apan tungod sa natala sa police blotter nga gibasehan sa Banat News sa gipublikar nga balita kaniadto’ng Hunyo 8, si Pelago nga taga Sitio Baybay II, Barangay Poblacion, dakbayan sa Toledo gitangtang sa iyang trabaho sa Metaphil.
Kini maoy hinungdan nga si Pelago nagpadala og suwat ni Banat News reporter Bryner Diaz nga nagsaysay sa iyang habig kun ngano nga namugna ang kontrobersyal nga isyu, diin matud ni Pelago nakamugna og kahasol sa iyang pamilya.
Matud ni Pelago nga “hangtod karon wa ko’y nadawat nga subpoena, wa usab ako pasakai og kaso, nagpabilin ko nga gawasnon, tungod kay dili tinuod ang police blotter ni SG Pogoy batok kanako. Ug ako ang nagpa-summon ni Pogoy tungod kay tumo-tumo lang ang tanan sa iyang police blotter nga maoy imong gibasihan ug dili ko guilty sa mga akusasyon.
“Niadtong June 6, dili normal ang pag-rekesa ni SG Pogoy nako. Apan bisan pa man nahuman g’yud ang pag-conduct nila og inspection kanako sa South Gate. Nahibulong lang ko ni Pogoy nga ang bulsa sa akong uniform sa left chest pocket nga didto akong kaha sa sigarilyo nga wala’y sulod, nga human niya rekesaha nga wala siya’y nakuha gikan niini, iya na pud usbon og koot ug kuhaon niya ang kaha sa akong sigarilyo nga wala’y sulod.
“Sigehan na man niya ug kuot ang akong bulsa samtang busy ko sa pagpa-inspection sa akong bag ug pagkuha sa akong I.D. sulod sa akong bag kay nalimtan man nako pagsul-ob ang akong I.D. Niadtong tungora gitapi nako iyang kamot uban sa pag-ingon nga “didto na lang ko usba og inspection sa Main Gateâ€.
“Kay nitumaw man ang akong pagduda ni SG Joel Pogoy sanglit unusual kaayo iyang pag-inspection nako niadtong tungora. Tuyo usab nako nga dunay laing makakita gawas sa iyang kaubang guwardiya nga ila kung usbon pag-inspection. Nipadayon ko sa Main Gate sakay sa akong motorsiklo nga wala gukda sumala sa imong gisulat. Iya lang kong gipaatangan sa kauban niyang guwardiya.
“Ug nalantawan nako si Kernel Martinez nga head sa mga guwardiya sa Tsuneishi. Ug didto nagpa-inspection ko daplin sa karsada aron dunay makakita namo nga laing tawo. Ug tuod man duna gyud nakakita nga kauban nako sa ilang pag-inspection og usab. Ni-cooperate ko sa tanan nga hangyo ni Martinez sa gihimo niyang pag-search nako, uban sa mga C.I ug K-9 dog cleared ko sa maong inspection, paghuman nila sa pag-inspection nako, ang mga dalan na pud nga akong naagian ang ilang gi-search.
“Human niadto gitugotan nako nilang maka-uli uban sa ilang paghangyo nga willing ba ako nga e-under investigation ug nisugot ko sa way pagduha-duha kay di man ako guilty.
“Sukad niadtong adlawa under-suspension ko hangtod karon. Ug tinuod pa nga nakit-an ko nila nga naglabay og pakete sa shabu (base sa police blotter) dili na ako makagawas sa gate sa Tsuneishi sanglit usa lang nila katawag puwede nako e-hold ug magtawag sila og police. Apan wala kana mahitabo.
“Ang guwardiya nga si Pogoy igo ra nagpa-blotter og tumo-tumo. Wala gani siya nihatag og report sa nahitabo didto sa akong employer nga mao ang Metaphil. Ako pa man gani ang unang nihatag og statement sa akong employer. Ug basi sa legal aksiyon nga among gihimo, karong June 26, 2014 sa 11 sa buntag ang among atubang ni Pogoy sa Buanoy Balamban Brgy. Hall.
“Nanghinaot ko nga gahinan nimo og panahon sa dili madugay kining akong situwasyon, nga nagresulta og dakong kadaot sa akong pagkatawo ingon man sa METAPHIL nga akong employer,†matud ni Pelago sa iyang suwat ngadto sa reporter.