Upat naangol human diriyot ma-trap sa nasunog nga building

CEBU, Philippines - Upat ka tawo ang nangapaso human naugdaw ang usa ka building ug nakan-an sa kalayo ang silingan niini nga establisemento human usa ka sunog ang mitumaw sa lungsod sa Carmen, Cebu ala 1:35 sa hapon sa nakalabay nga adlaw.

Ang Yoshio Home Décor Incorporated nga nahimutang sa Barangay Cantumog, Carmen nga gipanag-iya ni Paul Yu nasunog.

Upat ka mga trabahante ang napaso sa maong hitabo nga naila nga sila si Maria Jadraque, 30, taga Cantumog, Helen Cambaya, 35, taga Ipil, Niña Quijano 21, taga Corte, Carmen ug Mary Rose Durano, 23, nga taga Luyang, Carmen nga na-trap sa sulod nga bahin ug nakaangkon og second degree burns ug gidala sa tambalanan. Matud pa ni PO3 Jeron Quimque sa Carmen Police nga nahinabi sa Banat News ang sanding building sa maong establisemento ang naugdaw, samtang partially damage sab ang packing area niini.

Subay sa impormasyong nadawat sa kapolisan gikan sa imbestigasyon sa kabomberohan sa Carmen, gitug-an ni Fire Officer One Ronald Tellidua nga ang sunog nagsugod sa nangatagak nga baga o welding flux gikan sa nag-welding sa taas nga bahin sa maong building.

Pasado na ala 1:45 sa hapon nakontrol ang maong sunog nga girespondehan sa kabomberohan sa Danao, Compostela ug Catmon ug nagbilin og gibanabanang kapin usa ka milyon ka pesos nga danyos.  - /EIM (BANAT NEWS)