Holiday karon sa Lapu-Lapu

CEBU, Philippines - Wala’y trabaho ug wala’y klase karong adlawa sa Dakbayan sa Lapu-Lapu nunot sa ika-53 ka tuig sa ilang Charter Day.

Base sa Presidential Proclamation No. 775 nga gipirmahan ni Executive Secretary Paquito Ochoa Jr., ang Hunyo 17, 2014 gideklarar nga non-working holiday sa maong dakbayan.

Matud pa ni Lapu-Lapu City Administrator Teodolo "Teddy" Ybanez simple lang ang ilang selebrasyon diin igo lang mopahigayon sa buntag og flag raising ceremony sa City Hall ug wala na’y lain pang kalihukan nga mosunod. Gituyo kini aron makaminus sa gasto gumikan usab sa mga nagsingabot nga mga dagkung kalihukan sa siyudad. Karong buwan sa Hulyo ipahigayon ang launching sa Lapu-Lapu branding, ang "Free Yourself in Lapu-Lapu" ug ang umaabot nga Taxpayers Night nga pulos adunay dakong gahin alang sa maong mga kalihukan.

Ang mga pribadong kompaniya ang gihatagan sa katungod kung modeklarar usab sila og holiday karong adlawa.

Subay sa balaud sa pamuo, ang mga trabahante nga motrabaho atol sa usa ka non-working holiday adunay dugang porsiyento sa suhulan nga madawat. (BANAT NEWS)