CEBU, Philippines - Nag-alayon na karon ang Bureau of Customs (BOC), Philippine Coast Guard (PCG) ug Cebu Port Authority (CPA) alang sa hugot nga pagmonitor sa mga pribadong pantalan sa Sugbo.
Kini human nigawas ang taho sa kaulohan nga may mga pribadong pantalan sa Sugbo ug sa ubang bahin sa Kabisay-an nga gigamit nga agianan sa pinalusot nga kontrabando.
Apan matud pa sa Deputy Customs Collector for Operations sa BOC sa Sugbo, Atty. Paul Alcazaren, nga wala sila’y nadawat nga report nga may mga smuggled goods ang gipalusot sa mga pribadong pantalan sa Sugbo ug sa ubang bahin sa rehiyon.
Bisan pa man niini, si Alcazaren nitumbok nga ang ilang buhatan uban ang abag sa CPA ug PCG mopahigayon og hugot nga monitoring sa mga pribadong pantalan sa rehiyon.
Samtang si PCG commander Weniel Azcuna nitug-an usab nga mobutang sila og mga personnel ug K9 dogs sa tanang pribadong pantalan sa Sugbo aron dili makalusot ang mga smuggled goods. (Chester Abadilla/GMR)
VECO, Mandaue magtinabangay
Makaangkon na og sugang dagitabnon ang mga suok nga bahin sa dakbayan sa Mandaue.
Gitugotan na sa konseho sa dakbayan si Mayor Jonas Cortes nga makapirma sa memorandum of agreement tali sa Visayan Electric Company.
Ang kasabutan magtumong sa pagpalambo sa mga sugang dagitabnon ug pagtaud og bombelya ingon man sa pagmintinar niini.
Sa maong kasabutan ang kagamhanan sa dakbayan maoy moila sa mga dalan nga nagkinahanglan ang pagtaud o pag-ilis og mga sugang dagitabnon alang sa paghatag og dugang pang kahayag sa panahon sa kagabhion.
Ang pagtinabangay sa kagamhanan sa dakbayan sa Mandaue ug VECO maoy pagdugang sa nasugdan na nilang gihimo sa miaging tuig nga gihimo sa mga publikong tunghaan.
Nasayran nga ang VECO maoy mitabang sa kagamhanan sa pagtaud og mga sugang dagitabnon sa mga lawak saringan sa matag pangpublikong tunghaan sa dakbayan, elementary ug high school. (BANAT NEWS)