CEBU, Philippines - Nangabot na sa probinsiya sa Bohol ang mga sakop sa Commission on Human Rights (CHR-7) alang sa himuong ocular inspection sa crime scene diin nahitabo ang shootout tali sa kapulisan ug sa grupo sa kanhi polis nga si Owen Rosales nga gipasanginlang drug lord sa probinsiya.
Apan gawas sa ocular inspection mihimo usab sila og dugang pakisusi kalabot kang Amy Camero nga taga Talisay City kinsa usa sa mga nakalas sa panghitabo kansang pamilya mireklamo ngadto sa ilang buhatan.
Nasayran nga unang giadto sa CHR-7 ang Talibon Police Station ug nanguha og impormasyon may labot sa pagbanhig-patay sa hepe sa Ubay Police Station nga si Chief Insp. George Caña.
Gihulagway sa chief investigator sa CHR-7 Primo Cadampog nga “overkill†usab ang nahitabo kang Chief Insp. Caña tungod kay nagusbat man ang dagway niini.
Gikan sa Talibon, midiretso ang CHR sa crime scene sa Bien Unido ug ilang gisusi ang tulo ka cottages nga maoy gipuy-an sa grupo ni Rosales.
Usa sa ilang gitan-aw ang inagian sa bala apan si Cadampog miingon nga di nila maklaro kun nagbinayloay og bala ang duha ka habig tungod kay duol man sa dagat ang crime scene hinoon estoryahon sa CHR ang caretaker sa maong resort.
Gawas sa Talibon ug Bien Unido miadto usab ang grupo ni Cadampog sa Guindulman diin giingong nagpuyo si Camero.
Nasayran ning pagbukas sa klase moeskwela unta si Camero sa Bohol Island State University tungod kay gigastuhan kini sa usa ka naila lang sa pangalan nga “Tuklay.â€
Sumala pa sa CHR-7, dili pa sila makaingon kun shootout o rubout ang nahitabo sa Bien Unido tungod kay padayon pa sila sa ilang himoong imbestigasyon. (BANAT NEWS)