CEBU, Philippines - Gikondena sa labaw sa Central Command (CENTCOM) ang paggamit og command detonated explosive device sa New People’s Army (NPA) didto sa Barangay Bogtusan, Las Navas, Northern Samar, niadtong nakalabay nga semana nga gikamatay sa tulo ka mga sundalo ug pagka- angol sa laing mga upat.
Kini ang gipamahayag ni Lt. Gen. John Bonafos ang pangulo sa Central Command dinhi nga nahinabi sa Banat News.
Matud pa ni Bonafos nga usa kini ka desperado nga lakang sa mga rebelde nga migamit nalang og landmine alang sa mga sundalo.
Sumala pa nga peligro kaayo ang gibuhat sa NPA gumikan kay dako kaayo ang kahigayonan nga maamong ang mga sibilyan sa pagpabuto niini kung makuyog sila sa mga sundalo.
Dugang pa ni Bonafos nga usa ‘sab kini ka kalapasan sa balaod sa Part III, Article 3, No. 15 of Comprehensive Agreement on Respect for Human Rights and International Humanitarian Law (CARHRIHL) nga klarong nagdili sa paggamit og landmine.
Ang New People’s Army ug ang armadong kusog sa nasud misulod sa maong kasabutan niadtong March 16, 1998.
Sa nasayran nga tulo ang patay ug unom ang angol sa maong pag-atake nga mga sakop sa 34th Infantry Battalion sa Philippine Army ug gisundan pa sa 25-minutos nga binakbakay, una pa misibog ang mga rebelde.
Ang mga namatay naila nga sila si Pvt. Lino Mahinay, Pfc. Jaype Yulas og Pfc. Albert Abolencia, samtang angol sila si 2Lt. Marco Abante, Cpl. Ronnie Balastas, Pfc. Gerry Culaban, Pfc. Danmar Ching, Pfc. Marlon Urbano ug Pfc. Buenaventura Raygon.
Nakuha sa kasundalohan ang 1,500 meters nga electrical wire nga maoy gigamit sa mga rebelde sa pagpabuto sa landmine ug lima ka blasting cap’s ug lima ka improvised explosives.
Ang Northern Samar giisip sab ni Bonafos nga mao nalang ang nahibiling lugar nga dunay presensya sa NPA human nga ila nang nakontrolar ang southern nga bahin sa maong probinsya. (BANAT NEWS)